الثلاثاء، 29 أبريل 2014

تكلفه المعيشه فى السعودية


سؤال محير كل الناس اللى عايزة تسافر .. "انا كلامى موجه للناس اللى عايزة تسافر السعودية"
هنصرف كام فى الشهر ؟!!
السؤال دا انا هجاوبك عليه دلوقتى بس الاول لازم تعرف الاول حاجة على اد لحفاك مد رجليك ..
يعنى كل واحد متعود على حياة معينة فى مصر فى ناس ممكن تيجى على نفسها فى الاكل والشرب فى ناس متقدرش مش هطول عليكم هخش على طول فى الموضوع ..
اولا- السكن
بند مهم جدا ولازم تعرف اذا كانت الشركة هتوفرلك سكن عزاب ولا سكن عوائل عادة بدل السكن بيكون 25% من الراتب الاساسى بتاعك اى مايعادل 3 رواتب فى الشهر يعنى لو راتب 3000 اساسى يبقى بدل السكن بتاعك 9000 فى السنة . وهكذا لو راتبك 2500 يعنى 2500*3 = 7500
متوسط اسعار السكن هنا فى السعودية اقل شىء غرفة وصالة ب 9000 ريال ودى مثلا ممكن يجلس فيها 3 افراد على اقصى تقدير .. او طبعا لو هتجيب زوجتك يعنى اقل شىء تقبل بيه ان بدل السكن بتاعك السنوى لا يقل عن 9000 ريال وانا بقول اقل شىء .
ثانيا –المواصلات
بدل المواصلات فى معظم الشركات هنا بيتراوح من 500 الى1250 حسب اتفاقك معاهم بس الاغلبية 750 او طبعا بيسلموك سيارة حسب وظيفتك وطبيعتها لو ظيفة مكتبية بيكون فى وسيلة نقل خاصة 
طيب لو هنقضيها مواصلات لازم تعرف ان اقل ليموزين فى السعودية اقل شىء 15 ريال ودى مسافة قليلة جدا المشواير هنا بتبدى من 20 ريال وانتا طالع وطبعا المملكة شوارعها ضخمة جدا يعنى لو هتضيها مواصلات بالليموزين اقل شىء فى اليوم 40 ريال *26 يوم عمل = 1040 مواصلات فقط .. الكلام موجه اكثر للى عايز يشتغل فى الرياض ويمكن مكة الليموزين اغلى من كدة.
ثالثا-الطعام والشراب
هتكلم عن وجبة الغداء اهم وجبة:
دى نقطة مهمة جدا بقى لازم تبقى عارف يا مصرى يا للى جاى ..ان هنا الاكلة الرسمية بتاعت المصرين الدجاج 
بكل انواعة مندى مسحب مضغوط بخارى بروستد وربع الدجاج بيكون من 9 ريال وحتى 15 ريال دا بالنسبة لاخواتنا الى هيبقو شقاينين زى حالاتى ومش هيقدر يطبخوا فى البيت بسبب مواعيد الدوام المتصلة لكن لو هتروح وتطبخ فى البيت هيوفر معاك جامد لان الدجاجة كلها على بعض 1 ك ب 11 ريال تقريبا وطبعا هتحتاج حاجة تهضم مش اقل من 2 ريال او 1.5 ثمن كانز البيبس .. وكل واحد فى الاخر حسب معدته ومطرح مايسرى ... يمرى 
طبعا فى اشكال والوان من الاكل بس كل واحد بقى يتحمل نتيجة رغبات كرشة !!
يعنى فى الاخر تقدر تقول ان وجبة الغدا لو هتاكلها من برا فى الحدود دى هتكلفك حوالى من 300 الى 400 ريال شهريا
الفطار والعشا مش هزيدو عن 10 ريال ممكن تجبلك ساندوتش مكس بطاطس بيض وفلافل او فول الساندوتش من 2 الى 4 ريال ويشبعك يعنى الفاتورة بتاعت الاكل بس هتعملها حوالى من 700 ريال .. 
والمية هنا او المويا زى مابيقولوا عليها .. محدش بيشرب من الحنفيات ياخوى.. هنا كليها مياه معندية بتروح تقيب القارورة بتاعت المية 18 لتر او 20 ب 5 ريال وتكفيك حوالى اسبوعين ولا حاجة .
انا حبيت اتكلم فى الموضوع دا .. لان قبلت ناس قالولى انك مصاريفك مش هتزيد عن 500 ريال طبعا دى كانت كدبة كبيرة اوى ممكن اى حد يتعرضلها لكن الحقيقة ان مصاريفك عمرها مهتقل عن 800 ريال فى حالة انك مش مدخن 
طبعا لو هتشرب سجاير دا موال تانى لان علبة السجاير هنا من 7 ريال وحتى 15 وربنا يباركلكم جميعا .. 
يارب اكون افدتكم ولا تنسونى من الدعاء

اخوكم احمد بكر ДhmeĐ BДkr
على الفيس بوك
مشاركة